Volume I Version I   ☼   Today is 

NEW YORK REFLECTIONS #4

LINGGO

At nagsimula ang  Misa
Pero aaninagin ka nila
Simula ulo hanggang paa
Sino kaya ito, alam kong tanong nila.

Ganoon din
Pinoy diyan, Pinoy dito
May ngiti, may dating
Kapag nagkakapiling
Sa loob man ng kapilya
O malaking katedral kaya
Buhay na pagsamba
At pagtawag sa Maylikha.

Sige nga,
Maghanap ka
Ng simbahan dito
Tiyak na may makikita
Kababayang nagsasamba.

Sa una lang magtataka
Baki't ka nagmimisa
Sa simbahang banyaga
Di ba Pilipino ka?

Pero mukhang walang Donya Titay
Na panay ang paypay
Kasi naman, malamig dito
Kaya imbes na paypay
Mga pasosyal na "ehem"
At matahimik at malarobot na galaw
Ng puwit sa silyang maykulay
Aba nakakahiya nga naman
Naka coat and tie ka pa naman
Kaya, hala, pinong galaw
At tahimik na tatangu-tango
Sa homilyang naintindihan kaya?

At pagkatapos ng Misa
Tiyak may tawanan
Kuwentuhan, kumustahan
Kahi't laging magkakasama
Kasunod ang kainan
A, alam mong may Pinoy diyan.