 |
||
 |
|
|
Home BishopStude SundayMassMP3 FromthePriests Directory Offices Schools NewsArchives Gallery BalangaRocks |
||
|
|
|
 |
||
|
|
|
|
||||
SA KANDUNGAN NG IMAHEN ... (Kay Patricia, ang Pulubing Negrang Laging Natutulog sa Loob ng Simbahan ng Our Lady of Peace sa 62nd Street)
Doon ka tiyak hihimlay Matapos ang maghapong paglalakbay Sa kung saan-saan Sa kung kani-kaninong anino At kung anu-anong naglahong pangarap Ang muli mong bibitawan Tuwing daraan ang mga deboto ng Birhen Sa iyong paanan.
Sabi mo baliw ka na Nang iwan ka ng isang anak na suwail At asawang mahilig kang saktan At pangako ng ibinoto mo noong halalan Na sabay na naglaho Nang pumatak ang unang yelo sa daan At ng luha sa iyong kulubot na mukha.
Pero nakita kita kahapon Huwag kang magkaila Nakaluhod ka sa may paanan ng imahen Ng Birhen na sabi mo ay bingi at bulag Sa katulad mong nangangarap.
Ano ba ang ibinubulong mo? Tiyak na hindi ang tungkol sa Olympics O kaya ang bagong stadium sa Brooklyn; May dasal ka ba na nais iparating Sa Diyos na sabi mo ay hindi namamansin? May natitira pa bang pag-asa Sa puso mong sabi mo ay punit-punit na Sa kahihila sa mga bagahe ng kahapon At kabibingwit ng mga dahon ng nakaraan?
Alam kong may natitira pa rin Ga-butil man ang pag-asa at damdamin Hindi ka nag-iisa sa iyong mga naisin Bingi man ang lipunan sa iyong pag-aakala May natitira pang kamay sa iyo ay aakay May ga-hibla pa ng liwanag Sa mga gabi mo ay tatanglaw Sa isang pusong nasugatan ng nakaraan.
Sige nga, isigaw mo ang nasa iyong isipan Sa imahen na lagi mong pinagtatawanan Malay mo, isang araw, sagutin ka niya Tulad ng kuwento ni Barbara Na nakakita ng anghel sa ilalim ng tulay Nang magdasal siya sa simbahang madilim Sa birhen ng mga birhen.
|
||||
|
||||
|
|
|
|
|
|
|
|
 |
||
|
|
|