Home BishopStude SundayMassMP3 FromthePriests Directory Offices Schools NewsArchives Gallery BalangaRocks

AKO’Y TAGA-IMMACULADA NA!

Fr. Lides Pomer

July 18, 2005 ng aking nilisan ang Bahay Puso at Munting Tahanan upang manirahan sa bagong tahanan. Mag-isa akong umalis patungong Pto Rivas at paglabas pa lamang ng tarangkahan, luha ay tumulo ng tuluyan, hindi maintindihan, hindi mawari yaring kalagayan. Dumating ako sa Parokya ng Immaculada Concepcion, Pto Rivas, lahat ay nagkakagulo, abalang-abala sa paghahatid sa kanilang Kura Parokong minamahal. Pumasok na lang ako sa Perpetual Adoration Chapel at doon ay nilunod ang sarili sa hapdi at kirot na aking natamo. Pinilit magdasal sa Mahal na Ina upang humingi ng patnubay at gabay. Inusal ang mga Misteryo ng Liwanag sa paniniwalang ako ay gagabayan. Hindi ko napansin isang oras na pala sa pag-iisa. Ang tanging laman ng puso ko, paglabas ng chapel: hindi ang kalooban ko, kundi ang kalooban Mo.

Naka alis na ang mga maghahatid, muli ako ay nag-iisa sa bagong tahanan sa pagsalubong ni Ate Aida at Allan, mga lingkod ng parokya. Hindi alam kung saan mag-uumpisa at hindi alam ang patutunguhan, subalit may bagong pagmamahal mula sa Diyos na pinaglilingkuran.

Ano itong aking nadarama, hindi maka kilos at hindi mawari kung saan mag-uumpisa. Unang gabi sa parokya muling nilunod ng luha at ang gabi ay naparam. Kinabukasan, unang misa sa parokya; inialay ng buong puso para sa Mahal na Ina. Sa aking pangungulila, ako ay nagpasya, kailangang bumisita sa bagong komunidad na aking kinatatayuan. Ginugol ang maghapon sa pakikipag-usap at pagbisita sa mga matatandang nakahiga na sa banig ng karamdaman. Hindi ko napansin ay maghahapon na, 16 na matanda ay aking nakilala. Sinuot mga suluk-sulok na bahagi ng parokya, malapit lang subalit hindi pala nabibisita. Kaya gayon na lang ang tuwa ng iba, abot tanaw ng simbahan subalit hindi nayayapakan. Hindi ko alam kung makasariling pagbisita sapagkat ang sanhi ng kalungkutan ay siyang nagpadama na ako taga-Immaculada na.